12 - Erretzü VTT

Errepideak eskuinera duenean zubia zeharkatu eta igotzeko (2,3 km), bide asfaltatua utzi eta zuzen jarraitu Etxeberriko erreka bazterretik doan bide harritsutik. Urrunago ezkerrera doan eta itzultzean hartu beharreko bidexka belartsua utzi (3 km), eta zuzen jarraitu haran zolatik. Paillet-eko Y bidegurutzean (3,8 km), platano handiaren azpian, ezkerreko bidexka hartu. Gorantz doa berehala, bi bihurgune zabal eskainiz, haritzez landatutako iratzelekuan. Bigarren bihurgune itxiaren irteeran, Erretzü mendia ageri da. Mendiaren hegoaldetik eta iturrietatik pasatzean uhinduz doan bidezidor lurtsu zabaletik jarraitu. Belartegiaren ondotik pasa eta, jaitsiera txiki baten ondoren, Erretzü mendi-lepo txikiaren bidegurutzera iritsi.

Erretzüko lepoko lau bidezidorren elkargunean (4,9 km), ezkerreko goranzko bidexka hartu. Hasierako maldaren ondotik, lauzetatik igaro erreka zeharkatzeko. Bideak eskuinerantz jarraitzen du (Baretosaren ikuspegia) eta zorrotza da, zati harritsu batzuk gainditu behar direlako. Amaiera delikatua da (50 m) eta Hurgaraiko lepora iristen da (5,6 km). Oinezkoentzako seinaleak ezkerrera erakusten duen bidea utzi eta aurrera jarraitu iratze arteko bidexkatik, beste aldeko mendi-mazelan. Ekialdeko isurialdeko bi haran zeharkatzen dituen pista ia horizontaletik luzaz jarraitu. Gailur-lerroko bidezidorren elkargunean (6,7 km), zuzen jarraitu hasieran apur bat igotzen dena pareko bidexka belartsutik Erretzü inguratzen jarraitzeko. Oihan txiki batean sartzen da (7,2 km), errekatxoa zeharkatzeko jaitsiera zuzena hasi aurretik. Etengabe gorantz doan oihan-pista bakarretik jarraitu, bidexka belartsura iritsi arte: eskuinerantz jarraitu. Ibarraren ondotik, gorantz doa iratzetatik bidexka harritsu batera iristi arte (8,6 km). Ezkerrera hartu eta laster eskuinera, bidexka horretatik igotzeko, Erretzü mendiaren iparraldeko zapaldaraino.

Oholegiko ordoki belartsuan (8,8 km), Maidalenako gopoilaren bista bikaina da (antena eta kapera). Ezkerrera igo gabe (etxola), eskuineko bigarren bidexka aukeratu (ia parean), belarretan behera Maidalena parean jaisteko. Laster, bidezidorra ezkerrera, eta oteen artean jaisten da, hainbat ariketa tekniko eskainiz: bloke solteak, lauzen gaineko zeharkaldia oihan txiki batean, legarrezko bihurguneak eta maila txikiak (kontuz). Horrela, Haritxabaletako etxeetara iritsi (9,7 km): bide asfaltatua hartu gabe, ezkerreko bidezidorra hartu eta, 100 m geroago, Y-an, ezkerrera igo bide belartsutik. Gero, bidexkak oihan txiki bat zeharkatzen du (zati teknikoak daude errekak zeharkatzean), eta, ondotik, zelai ireki batera ateratzen da, bide lurtsu batera jaisteko. Ezkerrerantz jarraitu, haritz bakarti handi baterantz.

Goihenlephoko haritz bakartiaren ondoko bidegurutzera iritsi (10,9 km): ezkerrera hartu, hesiaren bazterretik igo (oinezkoen bidezidorra utzi), eta, etxolaren (taberna) eta errekatxoaren ondotik, segi mendi-hegaleko bidezidorretik, Hargibele tontorraren parean (Atharratze inguruko mendiak ikusten dira). Hurrengo zapaldan (11,6 km), bidezidorra utzi eta eskuin segitu belarretik, ordokiaren amaiera aldera, hortik 100 metrora. Gero, eskuinera jo bidezidorraren hasiera aurkitzeko; iratze artean jaisten da bihurgune handi bat marraztuz. Hurrengo konkorrean, pareko pista berritik jarraitu. Lehenik laua da eta gero zuzenago jaisten da. Behean (12,5 km), joanerako bidera iristen da; eskuinerantz jarraitu haranaren zolan, hasierako errepide txikira eta Atharratze erdialdera berriro iristeko. Burdinerian, plazaraino joan zuzen (farmazia). Ondotik Rancot karrikartea hartu, latsagiko aparkalekura iristeko.