11 - Zünharre VTT

Atharratzeko latsagiko aparkalekutik, Ühaitza ibaian gora, Tram kalea hartu. Amaieran, Onizegaineko zubia hartu eskuinera ibaia zeharkatzeko eta, kanpalekuaren Y bidegurutzean (0,9 km), ezkerrera igo Onizegainetik. Zuzen jarraitu Salaberri kaletik. Onizegaineko hilerrian, Irigaraiko kaletik jarraitu zuzen. Saiheskobürüako bidexka harritsuak ematen dio segida kaleari. Jaitsiera arin baten ondotik, bide asfaltura iristen da. Kontuz eta eskuinera hartu (1,6 km) errepide asfaltatu berria. Pixka bat gorantz doa zelai eta zuhaizti artean eta Lexantzü-Zunharrera hurbiltzen da, Lexantzümendi muinoaren parean. T bidegurutzean (3 km), eskuinera igo C1 errepidetik Zunharre auzoraino. Adi, 400 m-ko tarte aldapatsua (% 15).

Zunharreko elizan (4 km), arnasa hartu eta gero zuzen jarraitu etxeen artean eta, landetxearen izkinan, ezkerreko errepidea hartu Lakarrirantz. Balkoi formako errepideak Alozeko ordokira eta Maidalenara ematen du eta, maldan gora leporaino, bidegurutze bateraino eramaten zaitu (5,3 km): eskuin jarraitu Lakarriko errepidetik, mendi mazelan zehar. 500 m urrunago, bide asfaltatua utzi eta ezkerreko bidexka hartu (pasatu ondotik kereta itxi). Bidezidorra estu eta malkartsu bilakatzen da beraz, baliteke bizikleta pixka bat bultzatu behar izatea. Ondotik, oihana zeharkatu, bigarren atexka igaro eta bide asfaltaturaino jarraitu (6,7 km): bide beretik jarraitu ezkerrerantz 700 m-etan zehar.

Ibarbordako Y bidegurutzean (7,4 km), Ibarrenbordako bidexka hartu, ezkerretara eta gorantz. Ibarbordako eraikinen ondotik igaro eta zuzen jarraitu bidezidor belartsu eta horizontaletik (atexka). Bidezidorrak zeharkaldi ederra egiten du hegoaldeko hegaletik, eta gero jaisten hasten da ("txirristaren" pasarte delikatua lehen ibarbidean). Jaitsi ahala, bidea zabalduz doa pixkanaka, eta pista harritsu batek, beti zuzen, Etxebarre herrira eramaten zaitu, Lexantzümendiaren zaintzapean. Etxebarre herriaren bihotzean (9,6 km), eliza eta pilota plaza baino 50 metro lehenago, ezkerrera hartu 6. etxearen izkinan (Xabalgoitia), landa-bide belartsutik. Kunbo batera jaisten da eta, bordaren ondotik, sigi-saga doan bidexka bilakatzen da da, ibairaino jaisteko. Hormigoizko zubia igaro (10,4 km) eta errepidea ezkerrerantz jarraitu, 200 m-etan zehar. Lehen bihurgunean (ikuspen txarra), ezkerreko bidexka hartu (bi zubi txiki). Gero, 150 m igaro pareko errepide txikian eta, lehen bihurgune itxian, bide asfaltatua utzi eta aurreko bide belartsua hartu (bi hesien artean). Nahiko azkar igotzen da sigi-saga eginez. Laugarren bihurgune itxitik ateratzean (11,5 km), ezkerreko bidea utzi eta zuzen jarraitu, hesia segituz, pista bakarreko bidezidorretik. Azken zatia, Zunharreko elizaraino, belarrean egiten da.

Zunharreko elizara zailtasunez iritsitakoan (11,8 km), justu eraikinaren ezkerreko kalea hartu (Iratzehegi bidexka). Azken etxearen ondotik, iturriaren gainaldetik igaro eta pareko bide aldapatsutik jarraitu. Bidea pista harritsua bilakatzen da. Y bidegurutzean, haritz handiaren azpian, bide horizontala eskuinetik jarraitu. Amaieran (zapalda belartsua), parean jaisten den pista bakarreko bidezidorrean sartu. Kontuz lauzekin. Behean (Zibozen sartzean), marmelada-tailerraren eta etxearen bazterretik pasa, eta, ondotik, eskuinera hartu, Bizkaiko bidea (13,3 km). Bidexka laborantzako kunbo baten hondora doa, eta, gero, pixkanaka, eskuinaldera jaisten da. T bidegurutzean, belartegiaren ondoan, eskuine ko pista harritsua hartu, eta gero, 300 m beherago, eskuineko bide asfaltatua hartu, Onizegaineko hilerriraino. Orduan, joaneko bidea hartu (ezkerretara), Onizegaineko zubira iristeko. Zubitik irteeran (15,7 km), ezkerrera igo Atharratzeko zentrorantz (D57), D918 ("Xaho" taberna-trinketea) hartuz. Erdiko plazan, ezkerreko Rancot kalezuloak latsagiko aparkalekura eramango zaitu zuzen.