16 - Zalhagaña Bezkoï

Anderexeko zutabearen azpian (5 km), artzain-bidea utzi eta pareko pista harritsua hartu (GTVTT seinaleak). Eremu irekitik igotzen da, eta laster bihurgune itxiak ditu, beti bizkarraren atzealdean, % 8-10eko maldako mendate erregular bat bezala, 3,5 km-tan zehar. Bidexkak sarraldi bat egiten du oihanean, ondotik muino argira itzultzen da, eta eskuinetara bihurgune itxi bat egiten du (8,5 km). Pistaren bihurgune itxia baino lehentxeago, ezkerretara, bidexka belartsu baten hasiera ikusten da. Mendien aurrean arnasa hartu ondotik, jaitsiera abiatu. 200 metro hurrunago, lehen bihurgunea ezkerrerantz doa. Gero, bihurgune txikiaren ondotik, bide nagusia utzi, kunbo oihantsu baterantz eskuinera jaisten den bidexka harritsua hartzeko. Behean, erreka zolara jaitsi une batez, beste ertzean pixka bat gorantz doan oihanbidea aurkitzeko (pago makurren azpian). Gero, bizkarrean finkatutako Burgiraiko aurritaraino jarraitu (9,5 km), eremu irekitik. Aurrien eta lizar handien azpian, bidezidorretik jarraitu. Hegoaldeko isurialdera jaisten da, diagonal panoramiko luzea marraztuz, iratze korridorean, Auñamendiko tontorraren parean. Ez da zailtasun berezirik baina erne egon, batez ere zuhaiztia zeharkatzean (bihurguneak eta maila batzuk), Bezkoiko lepoa baino lehentxeago.

Bezkoiko lepoan (10,3 km), etxolaren ezkerraldeko bizkarretik igaro, iparraldeko hegaleko oihanean berehala sartzen den beheranzko bidexka aurkitzeko. Laster, eremu harritsura iristean, kontuz (bizikletatik jaistea gomendatzen da), errekatxoa zeharkatu eta errekaren ezkerraldeko bidezidorretik jarraitu. Ibilbideak tarte teknikoak eta kaotikoak ditu, harri borobil solteak, mailak eta ildoak aurkitzen baitira. Bigarren zatian, bidea erabilgarriagoa da eta aldapa gutxikoa. Bidezidorra bi kunbo konexuetatik igarotzen da eta errepide zatira iristen da, Sügarretako bazterretxetik gertu (11,8 km). Bide asfaltatuko ezkerraldetik igo 300 metrotan.

Metalezko elektrika habearen oinean (12,1 km), Sügarretako bidea utzi eta eskuineko zeharkako bidexka hartu. Beherantz doa berehala, bihurgunetsu eta malda handian Sügarretako haranerantz. Iratzeditik ateratzean, pista, iratze eta ote artean hasten den bidexka zaharra bilakatzen da. Ezkerrera joan eta Sügarretako ibarxkaren ezkerraldetik jarraitu. Lehen kunboaren ondotik, bidezidorra ildo sakon eta estu batek urratutako tarte aldapatsu labur batetik jaisten da, eta bihurgune handi batean amaitzen da (bizikletatik jaistea gomendatzen da). Gero, beste bi kunbo zeharkatzean, tarte heze eta harritsuak dituen oihan-bidezidorretik jarraitzen du ibilbideak. Ondotik, soilgune bat zeharkatu eta hesiz inguratutako pentzearen eskuinaldetik igarotzen da. Behealdean, bidezidor erabilgarria (*) bigarren mailako errepide batera iristen da. Ezkerrera jarraitu Ligira itzultzeko. Orduan, elizaren eskuinetik jaitsi, Laminen zubira eta herriko etxearen aparkalekura iristeko. (*) Zuhaitz-enbor handi bik bidezidorra mozten dute azken jaitsieran. Mozketa-lanak aurreikusiak dira, bidexka berriz ere bizikletatik jaitsi gabe ibiltzeko modukoa izan dadin.