Os peregrinos, camiñantes e sendeiristas emociónanse ante a inmensidade do océano cando realizan o antigo Camiño de Santiago Costeiro e de Santo André, antes de bordear o cabo Prior ata San Cristovo das Serpes e as súas áreas paradisíacas, salvando os montes da Lagoa e Vilarquinte, O Val, Terra de Trasancos, e pasando entre os máis altos cantís de Europa.
Cada pedra deste camiño ten un nome propio, garda unha historia ou un segredo. Aquí, a marcha a pé ten a súa recompensa na intimidade das pequenas calas agochadas nos ocos dos cantís: as ocultas praias de Lopesa, Hortiña e O Casal.
A cala da Hortiña ten moito encanto por conservar intacta a integridade do seu litoral e tres illotes percebeiros de grande calidade e importancia económica.
Así e todo, é de moi difícil acceso, está actualmente reservado só para os expertos percebeiros, e resulta complicado ata para os máis aventureiros. Desfrutamos da impresionante panorámica do cantil, refuxio das colonias de aves mariñas e adornado pola herba de namorar, orquídeas e flores silvestres.