Na visita de Daniel Muñoz "SAN" ao Rexenera Fest do 2018 agasallounos con esta peza única e particular, pensada, documentada e realizada especificamente por e para Carballo. Trátase dunha tira de imaxes en formato Polaroid que retratan flashes de rúas da vila, e que establecen un curioso xogo co viandante. Coma nunha busca do tesouro, San convida ao transeúnte a mergullarse nas pistas que deixa nesas 5 estampas e a descubrir onde se atopa cada unha delas para poñer o foco no que xa ninguén repara…
Todas as obras de San obrigan a caer en interpretacións diversas e confusas, a pesar de narrar feitos e anécdotas cotiás, baseadas nos tópicos máis mundanos.
SAN é Daniel Muñoz, natural de Cáceres, e dende os seus comezos a súa obra foi marcadamente figurativa, xa que comezou a desenvolverse empregando, exclusivamente, o espazo público como soporte: facendo recoñecibles as súas mensaxes ao maior número de persoas posibles.Ver web do artista...