A PENA DA MOURA

Ao longo da historia foron moitos os pesos, físicos e tamén metafóricos, que as mulleres galegas cargaron sobre os seus ombros. Cestas de peixe, leiteiras, feixes de herba, bolsas da compra, mercadorías da feira, ou o gran peso da vida sobre as súas costas.

O mural de 2015 A Pena da Moura de Nómada é unha homenaxe ao matriarcado, en concreto ás mulleres galegas, e está inspirado na lenda local da Pedra Moura. A figura feminina do mural é a representación desta lenda, que explica a orixe do dolmen de Aldemunde. Conta a historia que a moura da lenda levaba unha pedra na cabeza mentres ía fíando e cando estaba xa moi cansa deixouna no chan, e a pedra medrou. A protagonista desta obra tamén aparece fíando, facendo un tapiz que representa ás mulleres galegas que antigamente levaban a cesta á cabeza, transportando as mercadorías das actividades comerciais daqueles tempos. No muro pódense ver un total de seis mulleres, cada unha delas portando diferentes produtos, facendo fincapé nos distintos oficios da época e destacando a importancia vital da figura da muller no desenvolvemento da nosa sociedade pasada e actual.

O estilo pictórico do artista é complexo e denso, posto que está cheo de simbolismos e metáforas visuais que conteñen reflexións profundas sobre a sociedade contemporánea e a condición humana.

Nómada é Miguel Peralta, natural de Almería pero residente en Santiago de Compostela, e forma parte de Cestola na Cachola. Traballa a ilustración, a pintura e o muralismo, combinando distintas técnicas e materiais.