PSICODELIA

Antes desta obra Psicodelia, estas paredes na chamada zona das Catro Portas de Carballo, un dos principais puntos de acceso á vila, destacaban polo seu mal aspecto.

O obxectivo principal de Paula Fraile á hora de enfrontarse con esta parede foi embelecela, pero dun xeito que logrou integrar nel e darlle a volta ás imperfeccións que presentaba, o deterioro, as humidades, incluíndo incluso outros elementos xa existentes como os carteis publicitarios que se conservaron ou as fiestras do edificio. Aproveitou esas humidades e pintou sobre elas, empregando cores de máis claro a máis escuro, segundo o desgaste que presentaba o muro. A partir desas humidades localizadas na parte baixa da parede, Paula comezou a xerar unha imaxe estrutural que crea ante nós a sensación de estar diante dunha representación dunha cidade en perspectiva. Realmente a intención de Paula non foi a de plasmar a imaxe dunha cidade completamente definida, senón que a idea que consegue coas formas xeométricas que aparecen por todo o mural e a multitude de cores vivas, dá como resultado unha escena nada realista se non que tende á psicodelia. O espectador debe deterse diante da parede e observar moi polo miúdo para poder descifrar algunhas formas urbanas.

Paula Fraile é unha artista manchega que desenvolve proxectos artísticos en distintos ámbitos e técnicas, destacando polos seus murais, pero tamén pola ilustración, gravado e estampación. Ver web da artista...