O palco ou quiosco de música do Paseo da Corredoira é un exemplar realizado en 1897 polo Concello de Tui. As bandas de música amenizaban os paseos dos veciños na Corredoira, creando un espazo dinámico e social dentro da cidade.
O 11 de Xaneiro de 1896 Don Xose Alvarez Barros, Don Xose Ignacio Perez Urgal e Dona Xoaquina Rey, solicitan ao concello de Tui que lles venda o terreo que existe entre as rúas das súas propiedades e a rúa Elduayen. Por unha Real Orde do 27 de Xullo de 1896 concédese a autorización para a venda da parcela de 520 metros cadrados na Praza do Cantón de Diómedes, polo prezo convido de 5.000 pesetas, e cedendo o terreo ao concello con prohibición de plantar árbores ou construír caseta de ningunha clase, excepto un quiosco para as bandas de música ou unha fonte. En sesión do 24 de Xuño de 1897 dáse conta da Real Orde de Xullo do ano anterior e autorízase a formalización do contrato. O 28 de Xuño de 1897 se ingresan nas arcas municipais as 5.000 pesetas e outórgase a correspondente escritura ante Notario o 30 de Xuño de 1897.
☚| PUNTO ANTERIOR
☛| SEGUINTE PUNTO