CAMIÑO DE SANTIAGO

O culto xacobeo tivo no Camiño Portugués un territorio fundamental para entender a verdadeira dimensión internacional do fenómeno das peregrinacións. Esta ruta adquiriu relevancia, sobre todo, a partir do século XII, tras a independencia de Portugal.

O seu trazado herda vías e camiños antigos, como a Vía XIX (século I d. C.), que unía Braga con Astorga a través de Ponte de Lima, Tui, Pontevedra, Santiago e Lugo, e que foi unha das calzadas romanas máis importantes, pois vertebrou Gallaecia.