O arrabalde formouse xa no século XII —privilexio da raíña Urraca en 1112— arredor dos muíños do río Tripes, dando así lugar á súa característica máis salientable. O carácter industrial do barrio completábase coa presenza dos pelamios, actividade dos curtidores da cidade e vía de saída de Tui cara a Baiona. O arrabalde conta con espazos emblemáticos, como o eirado xunto á ponte, reconstruída esta en 1712, a fonte ou lavadoiro ou o antigo matadoiro, edificado en 1785 polo concello e hoxe espazo cultural. Doutro lado da ponte e sobre un promontorio localizábase na Idade Media o cemiterio xudeu. No século XVI foi o barrio lugar de importantes propiedades de familias criptoxudías e o seu nome actual, A Saravia, orixínase en Antonia Saravia, pola casa e granxas que posuía neste núcleo xunto a outros familiares. O nome actual do barrio, Bispo Salvado, deriva da importante figura de frei Rosendo Salvado, cun labor polifácetico en Australia a prol dos máis desfavorecidos e referente adiantado ao seu tempo dos dereitos universais.