2. O patio de armas

Neste patio interior do castelo acontecía a cerimonia máis importante para garantir o funcionamento da sociedade feudal: o xuramente de fidelidade e vasalaxe. Este era o espazo elixido polos señores do castelo (Mariño, Trastámara e Moscoso) para facer entrega da administración do castelo e as propiedades que formaban parte do feudo a un home libre, neste caso un alcaide ou meiriño. O mecanismo para formalizar a relación entre ambos, a modo de contrato recíproco, era o xuramente de vasalaxe. O incumprimento deste acordo por parte do vasalo sería considerado coma felonía, traizón, e podía pagarse coa vida.

Dende este lugar podemos acceder as diferentes estancias dunha fortaleza cunha superficie intramuros de 805 m2, e de 1489 m2 incluíndo o paseo exterior. Nos edificios residencias situados na parte norte do castelo, atoparemos a antiga cociña, salón, cabaleriza e cuberto. Hoxe en día modificadas para acoller a mostra de artesanía “en vivo”. Podemos subir ao paseo das murallas (o adarve) e percorrer as catro torres, en especial a leste, xa que posúe unha exposición da Historia do Castelo e a Costa da Morte.

Este patio de armas agocha un segredo na súa parte central coa presenza dos alicerces da primitiva torre da homenaxe, anterior ao século XIII, que apareceron no proceso de limpeza e restauración da fortificación na década dos 80 por parte da Deputación da Coruña. Estes achádegos impulsaron unha escavación arqueolóxica en área na que atoparon novas estruturas anteriores, deixando na parte leste do patio un pequeno espazo rectangular restaurado.