O monarca leonés Fernando II ordenará en 1170 a construción dunha nova muralla para ensanchar a cidade cara ao río. O seu perímetro superaba os mil metros de lonxitude; deles mantéñense hoxe en día máis de novecentos metros, ocultos baixo as vivendas ou detrás da falsabraga, a nova liña de protección contra as armas de fogo levantada a finais do século XV. A muralla románica de Tui, única conservada en Galicia, contaba con catro portas principais (Pía, Bergán, Ferreiros e Arco) e tres portas secundarias que aínda sobreviven (da Corredoira, do Canto e do Postigo da Ribeira).