IGREXA DE SANTO DOMINGO

O asentamento dominico na cidade remóntase ao ano 1272 no barrio da Corredoira. O seu traslado en 1328 á parroquia extra muros de San Xoán de Porto propiciará a súa ampliación, así como a creación dun espazo urbano propio e dinámico. O convento foi construído en 1330, con obras de reforma nos séculos XV e XVI. A cabeceira edificouse entre 1409 e 1423, e nela destacan tanto a vinculación das obras á casa feudal dos Soutomaior como o conxunto de capiteis con escenas de caza e do nacemento de Cristo.