Durante este traxecto pásase ao lado mesmo de dous castros e das inmediacións de outros dous. Son os castros de Bouzalonga, Vilalbarro, Os Vilares e A Santiña, que se asentan ao lado do camiño, o que demostra a historicidade do mesmo.
Un castro é un asentamento estable e fortificado da Idade do Ferro e que puido seguir habitado en época romana. Pouco antes de entrar no lugar de Oroso de Arriba (á entrada do polígono industrial de Sigüeiro) e no medio dun frondoso bosque, está o castro de Os Vilares co seu aspecto circular, os seus terrapléns defensivos e foso rodeando a croa, que está cultivada.
Noutro castro de Oroso, o de Recouso, encontrouse un pequeno tesouro de xoias castrexas que se conservan no Museo das Peregrinacións de Santiago de Compostela.