O LUGAR DE A CALLE

Entramos no lugar de A Calle, da parroquia de San Xulián de Poulo. O pobo érguese ao longo do camiño, cun urbanismo en función do viario. Debido a esta relación co camiño e aos personaxes históricos que por aquí pasaron, denominouse tamén como A Calle Real de Poulo. O seu topónimo é unha clara referencia a esta relación co camiño.

Por aquí pasaron e se hospedaron célebres viaxeiros. Unha inscrición nunha pedra do marco dunha porta dunha vella casa e un escudo sobre o lintel da mesma, recórdanos que aquí pasou unha noite nunha humilde casa, o futuro rei Filipe II. Tamén pasou por aquí o nobre italiano Cósimo de Médicis en 1669, despois de peregrinar a Santiago de Compostela e camiño da Coruña, onde se embarcaría  con rumbo a Inglaterra.

Esta vinculación viaria fixo deste lugar un dos máis importantes da Terra de Ordes. Aquí celebrábase unha feira mensual á que acudían xentes de toda a comarca. Mais este papel predominante pérdeo ao se crear a nova capital municipal ao lado dunha nova e importante vía de comunicación.