FREI MARTÍN SARMIENTO NO CAMIÑO INGLÉS

Estamos na parroquia de Poulo. Por aquí pasaba o camiño real de Santiago de Compostela cara á Coruña. Poulo foi concello antes de ser agregado ao de Ordes. É un lugar que tamén aparece citado noutros itinerarios, como no de Cósimo de Médici, aínda que escrito “Poblo”.

Martín Sarmiento foi un frade ilustrado que, en 1745, realiza unha viaxe a pé pola súa terra e deixounos unhas interesantes anotacións sobre a Galicia de entón. Sae de Santiago o día seis de agosto cara a Ferrol. Nas súas notas nomea os lugares polos que pasa e que hoxe están no camiño inglés, lugares polos que xa pasamos ou imos pasar. O peregrino que vai cara a Compostela terá que pasar por A Ponte Pereira, A Santiña, Sigüeiro, nomes que cita Martín Sarmiento. E o peregrino está agora en Poulo a onde chegou Martín Sarmiento ao mediodía. Despois continuou cara a Buscás e Cabeza de Lobo, que nos di que está a unha légua “horrorosa”, e sube a costa de Rabo da Égoa cara a Hospital de “Gruma” (Bruma) e As Travesas, que está a dúas léguas de Poulo. Unha légua máis adiante está “Zarandones” (Sarandóns), onde pasa a noite para ao día seguinte ir cara a Betanzos. Neste tramo non coincide co camiño actual.