O ROMÁNICO EN ORDES

San Pedro de Ardemil é a primeira igrexa que se encontra no territorio do concello de Ordes. Uns quilómetros máis adiante pasaremos xunto á de San Paio de Buscás. Ambas igrexas están ao lado do camiño. Na primeira o camiño pasa por diante da súa fachada principal, na segunda pasa por diante da súa cabeceira ou ábsida.

Ambas son construcións sinxelas, dunha só nave e que responden ao prototipo do románico rural. En Ardemil destaca a súa porta do lateral norte, que remata en dúas mochetas arqueadas e lintel curvo. Na cabeceira unha estreita xaneliña. Diante hai un cruceiro e, a pouca distancia e indo polo medio dunhas leiras, está a fonte de San Pedro. Nos anos de seca levaban a imaxe de San Pedro en procesión e lle lavaban os pés para impetrar a choiva.

Na de San Paio de Buscás queda do seu estilo románico a súa porta con arco e as arquivoltas. Chama a atención a ábsida onde, nun fornelo pintado con dobre arco e o exterior polilobulado, encóntrase a imaxe do patrón da parroquia, imaxe de 1732. Á entrada do adro un carballo centenario. Algo separado, e no medio do lugar, un cruceiro até onde chegan as procesións.