HOSPITAL DE BRUMA

Hospital é o único núcleo da parroquia de San Lourenzo de Bruma e o único do concello de Mesía  no camiño inglés.

Está situado no medio dunha chaira, alta e solitaria. É un núcleo ligado á historia do camiño e cunha estrutura viaria. Esta vinculación viaria pode vir xa do tempo dos romanos e por aquí pasaría unha vía que, procedente da zona de Santiago, dividíndose neste lugar en dous ramais: un iría cara a Brigantium (A Coruña) e, outro, cara a Lucus Augusti (Lugo). Este papel viario perde importancia cando en 1770 se traza un novo camiño real separado deste lugar e sobre o que posteriormente se construirá a moderna estrada de Santiago á Coruña.

O topónimo indica que aquí había un hospital ou albergue para atender aos peregrinos e camiñantes, e está aquí desde ben pronto, pois aparece citado nunha doazón de 1175, polo que tiña que existir con anterioridade. Por aquí pasa o peregrino austríaco Christoph Gunzinger entre 1654 y 1655, e faino despois de ter chegado a Santiago e volver peregrinando para pasar polo Salvador de Oviedo; tamén nos fala deste lugar frei Sarmiento, que denomínao “Gruma”, tal como aparece na documentación medieval.