Si continuamos camiñando pola avenida que acabamos de cruzar encontrarémonos cun antiguo edificio que foi muíño de mareas, agora restaurado e convertido nun centro cultural e Museo dos Muíños.
Un muíño de mareas é aquel que aproveita a forza derivada da subida e baixada das augas mariñas, por iso se sitúan en lugares de forte contraste mareal. Nas costas galegas hai catalogados 14, algúns restaurados. Este é o máis antigo de Galicia, tendo noticias da súa existencia grazas á doazón do rei Fernando II ao mosteiro de Sobrado dos Monxes en 1186. Foi reconstruído no século XVI, pero a finais do século XX estaba abandonado.
Agora, restaurado, podemos ver un conxunto de varias edificacións que correspondían á vivenda, muíño e outras dependencias. Conta con catro moas, pero só unha funcionaba realmente con auga do mar. A presa viuse moi reducida coa construción da estrada e da vía do tren e o seu contorno moi afectado polo medre urbano. Estaba na desembocadura do río da Trabe, polo que tamén aproveitaba as augas destes.