A LENDA DAS CEN DONCELAS

A dereita do camiño queda a localidade de Bordel e nela hai unha antiga torre ou fortaleza. Sitúase aquí unha antiga lenda denominada O tributo das cen doncelas.

Conta que o rei Mauregato pactara cos musulmáns que entón ocupaban a península Ibérica, entregarlles anualmente cen doncelas, a metade delas tiñan que ter unha orixe nobre e a outra metade de procedencia humilde, coa condición de que non atacasen o seu reino. As mozas eran recluídas na torre de Peito Bordel antes de seren embarcadas na ría de Betanzos para o seu forzado cativerio en Córdoba. Así era durante anos, até que lle tocou á filla dun fidalgo. Segundo unha versión, o pai da moza, que non a quería entregar, ideou un plan para acabar con tal vergoñento tributo. Segundo outras versións serían os cinco irmáns da moza os que idearon o plan. Disfrazáronse de muller e introducíronse entre as que ían ser embarcadas para atacar aos musulmáns con polas de figueira, liberando ás mulleres e poñendo fin a este tributo infame. Hai outra versión que di que se agocharon entre as figueiras para logo atacar aos raptores. Por este motivo a folla de figueira está no escudo da familia Figueroa. Esta lenda tamén aparece en relación á mítica batalla de Clavijo.