O REI FILIPE II NO CAMIÑO INGLÉS

Dado que o camiño inglés une os portos de Ferrol e A Coruña coa cidade de Santiago de Compostela, era usado polos viaxeiros que se dirixían a unha ou outra destas cidades. Entre estes está o rei de España Filipe II, cando aínda era príncipe, como anteriormente tamén o fixera seu pai.

Filipe quedara viúvo da súa primeira esposa, a princesa María Manuela de Portugal. O seu segundo matrimonio vai ser con María Tudor, filla do rei Enrique VIII de Inglaterra e de Catarina de Aragón, polo tanto emparentada co seu pai, coa que en principio tamén pensou casar.

A comitiva, numerosa, sae de Valladolid cara a Santiago de Compostela. De aquí seguen o itinerario do camiño inglés até o porto da Coruña, onde embarcan rumbo a Inglaterra o 13 de xullo de 1554. A travesía durou sete días, chegando a Southampton un día de choiva. A voda tivo lugar na catedral de Winchester o 25 de xullo, día de Santiago. O matrimonio durou só catro anos.

No traxecto de Santiago ao porto da Coruña o futuro rei pasou unha noite nunha casa de Sarandóns, coñecida como Pazo de Barral, segundo se pode ler nun dos seus dous escudos. O edificio destaca dos outros pola súa fachada con arcos conopiais e a súa decoración, especialmente a porta central con bolas e as xanelas do piso superior.