PEREGRINOS POR BETANZOS: O BISPO ARMENIO MARTIROS DE ARZENDJAN

Deixamos a cidade de Betanzos, que foi un núcleo importante na Idade Media e capital dunha das sete provincias que conformaban Galicia na Idade Moderna. Situada ao fondo da ría, era paso obrigado para dirixirse a moitos outros lugares, non só cara a Ferrol e norte de Galicia, senón tamén cara ao interior, cara a Vilalba e Portomarín. Por aquí pasaba unha vía romana e o camiño real de Madrid. Foi un lugar importante e no de comunicacións nos vellos camiños, tamén nos de peregrinación.

Así, pasa por Betanzos o bispo armenio, de nome Martiros de Arzendjan, que peregrina a Santiago de Compostela no ano 1491. Este personaxe, despois de visitar a tumba de San Pedro, vai visitar a de Santiago o Maior, pasando antes por Oviedo. É desde esta cidade que se dirixe a Santiago, pasando por Betanzos e regresando polo mesmo camiño, despois de ir a Fisterra e relatarnos a existencia dun curioso monstro chamado “Vakner”, que devoraba á xente.

De regreso da peregrinación de Santiago pasa tamén por Betanzos o peregrino austríaco Christoph Gunzinger no ano 1665. Dinos que Betanzos era unha pequena cidade con bo pan, pero que o viño era de menor calidade.