A FESTA DOS CANEIROS

Cruzamos a Ponte Vella sobre o río Mandeo para acceder á cidade de Betanzos. Desde aquí sae, o 18 (o día grande) e o 25 de mes de agosto, a xente, en barcas e río arriba, para realizar a Xira aos Caneiros. Os Caneiros, nome dunha arte de pesca fluvial, é un campo xunto ao río Mandeo, fóra xa dos límites do concello de Betanzos, e é o último lugar no que o río é navegable.

Nestas datas de agosto Betanzos celebra as súas festas patronais e a Xira forma parte deste ciclo festivo do verán.

A xente sube o río en barcas engalanadas para pasar a tarde co grupo familiar ou co grupo de amigos ou cuadrilla. A merenda pódese facer no campo ou na mesma barca, acondicionada cunha mesa e bancos corridos. Durante toda a tarde soa a música das gaitas. O regreso á cidade faise de noite.

Esta festa ten a súa orixe a finais do século XIX. En orixe era unha festa comedida e a xente acudía vestida con certa elegancia. Despois foi evolucionando cara a posturas máis informais e, ultimamente, abundan os grupos de xente moza. Foi unha festa moi popular entre as xentes da cidade da Coruña na primeira metade do século XX, de onde saín trens especiais con xente para esta festa. Acudiu aos Caneiros a escritora Emilia Pardo Bazán.