IGREXA DA NOSA SEÑORA DOS REMEDIOS DE TIOBRE

Aquí pode admirar a igrexa da Nosa Señora dos Remedios de Tiobre, igrexa de estilo renacentista do século XVI-XVII. A construción do edificio atribúese a Juan de Herrera. A planta divídese en tres tramos de diferente altura: ábsida, cruceiro e nave. O corpo principal pertence ao presbiterio, cuberto por unha gran bóveda de dobre trazado con terceletes. No cruceiro ábrense dúas capelas, dedicadas a San Caetano e Santo Antón, ambas cubertas con bóveda de crucería. Na fachada principal contén as imaxes de Cristo, Santiago e San Roque. Este santuario foi saqueado polos franceses en 1808. A orixe do templo está relacionada coas lendas baseadas nas aparicións da Virxe. Sábese da existencia neste mesmo lugar dunha ermida anterior, que posuía hospital para peregrinos.