Cruzamos a ponte do Lambre, unha ponte de orixe medieval e cunha lenda histórica.
Roxín Roxal era o criado que máis estimaba Nuno Freire de Andrade, señor das terras do Eume. Como mostra dese aprecio regaláralle unha daga de prata. Tareixa, a filla de don Nuno, deixábase acompañar por Roxín Roxal e acabaron namorándose. O pai decatouse da relación entre os dous mozos e decide casar a filla co cabaleiro Enrique de Osorio, apartando a Roxín Roxal da moza e expulsándoo das súas terras.
Por entón chega a Pontedeume a noticia de que un gran porco bravo estaba esnaquizando os cultivos dos labregos. Don Nuno organiza unha cacería para abater á fera. Don Henrique invita a dona Tareixa a acompañalo na cacería para demostrarlle a súa valentía. Cans e criados foron cercando o terreo e o porco bravo saíu do seu agocho para fuxir, atravesando o río Lambre pola ponte. Aquí agardaba don Henrique. Ao ver o xabaril disparou unha frecha que só fire ao animal no lombo e a fera abalánzase sobre a xente que alí estaba. Don Henrique tírase ao río para librarse, mais a fera ataca a súa esposa. Cando don Nuno e os seus acompañantes que viñan perseguindo ao xabaril chegan á ponte atopan o cadáver de dona Tareixa, pero non hai rastro do animal. Días despois aparece na ponte o porco morto cunha daga cravada no pescozo, a daga que don Nuno regalara a Roxín Roxal.