Encontrámonos neste tramo do camiño seguindo a traza do histórico camiño real que ía de Santiago e A Coruña a Ferrol, pasando por Betanzos. Acabamos de baixar a costa do Viadeiro, que nalgúns relatos aparece cualificada como penosa de baixar, é dicir, mala. Aquí houbo duros combates entre as tropas napoleónicas e os guerrilleiros galegos.
No último tramo de baixada, e antes de chegar ás primeiras casas, pódese ver á dereita da estrada os restos do vello camiño real que subía cara ao O Viadeiro. É un camiño profundo e estreito, como unha trincheira. Na memoria oral local fálase de que nesta costa aproveitaban os ladróns para asaltar as carruaxes que por aquí subían moi lentamente.
Agora imos cruzar a ponte sobre o río Baxoi. A ponte é unha das varias que mandou erguer Fernán Pérez de Andrade “o Bo”, señor destas terras, a finais do século XIV. Cando deixemos o concello de Miño farémolo por outra ponte, a de Lambre, tamén da mesma época e co mesmo mecenado.