A CONSTRUCIÓN NAVAL

Fene é un municipio que cambiou de ser un espazo eminentemente rural a outro máis urbano e nun núcleo da periferia urbana da cidade de Ferrol. Isto é debido especialmente ao establecemento na súa costa, na localidade de Perlío, dos estaleiros Astano en 1941 e á construción, entre 1966 e 1968, da ponte das Pías de unión con Ferrol; por estas datas tamén se produce a transformación de Astano nun estaleiro para a construción de grandes barcos de transporte, especialmente petroleiros. Neste contexto Fene pasou de ter 8.000 habitantes en 1940 a dobrar esta cifra en tan só 30 anos. Isto levou a un amplo desenvolvemento urbanístico, especialmente nas zonas máis próximas ao lugar onde se instalou o estaleiro e o novo acceso a Ferrol, crecemento que transformou a vella paisaxe agraria. Na actualidade segue a construción de novas casas unifamiliares, e que se poden ver claramente ao lado do Camiño, especialmente no tramo de entrada neste termo municipal  desde Neda.

Ao lado destas novas construcións se poden ver algunhas vellas casas no abandono e poucas destas restauradas. Tamén hai que destacar algunhas casas, de arquitectura tipo indiana, que saltean o mapa urbanístico de Fene, algunhas en bo estado, outras non, como a coñecida como “Casa Cela”, coroando o parque Castelao, que está ao lado mesmo do camiño e onde se colocou unha estatua dedicada ao pallaso, obra do ceramista Xosé Pérez Porto.