AS FONTES PÚBLICAS DE AUGA

Ao longo do camino vaise encontrar con numerosas fontes de auga. Só no traxecto de Fene se pasa por diante de tres e hai unha cuarta case ao lado, a fonte do Campo. Agora estamos diante da fonte da Casanova; en Mundín encontraremos outra.

As fontes son importantes elementos vinculados aos camiños, onde pode o camiñante e o peregrino saciar a súa sede, refrescarse e descansar.

As fontes teñen no mundo rural unha función utilitaria; no mundo urbano e nas vilas teñen tamén unha función ornamental. O peregrino poderao comprobar cando pase pola praza do Campo da cidade de Betanzos e contemple a fonte de Diana. Pero no espazo rural tamén se encontran fontes con certa beleza estética e monumentalidade, como a que encontraremos en Gas (Paderne). A chegada das modernas traídas de augas e a falta de poboación levou ao abandono e desaparición de moitas delas.

As fontes poden ir acompañadas de construcións complementarias, tales como un bebedoiro para o gando, un lavadoiro onde ir a lavar a roupa que, normalmente, é unha simple pedra inclinada, pero ás veces se forma unha especie de piscina rectangular con lavadoiros en varios lados e que pode estar cuberto (como neste caso). Algunhas fontes teñen unha cruz e outros elementos decorativos como complemento. Hai fontes onde habitan seres mitolóxicos, onde se di que a súa auga é boa para curar enfermidades ou onde se vai pedir que chova.