O MUSEO DO HUMOR

Entrando na localidade de Fene, a pouca distancia de aquí, encóntrase o Museo do Humor, o único en Galicia sobre o humor gráfico. Está situado nas dependencias da Casa de Cultura.

Tras unha exposición itinerante por Galicia adiante, no ano 1983, de debuxos de dous dos mellores humoristas gráficos galegos, Xaquín Marín e Siro, estes autores lanzan un manifesto no que reivindican o humor como unha das calidades distintivas do espírito galego, algo que sirve para rir, pero tamén para pensar. Ao ano seguinte nace en Fene o Museo do Humor do que Xaquín Marín será o seu director.

Nas súas instalacións se pode ver obra gráfica dos mellores humoristas de Galicia e doutros lados, pois a súa intención é dar a coñecer os humoristas galegos fóra de Galicia e aquí os do resto do mundo. O Museo edita unha revista e convoca anualmente varios premios co nome de Curuxa, entre eles o dedicado a unha persoa ou institución que destaque polo súa falta de humor.