A LENDA DO CRISTO DA CADEA

Na igrexa parroquial de Santa María de Neda encóntrase a imaxe dun Cristo, coñecido como o Cristo da Cadea por ter unha cadea ao redor do corpo que o suxeita á cruz.

Esta imaxe chegaría ao porto de Ferrol  nun barco procedente de Inglaterra en 1550 e sería comprada polo párroco de Neda, colocándoa despois no templo. No barco virían outras imaxes que irían para a catedral de Mondoñedo ou para Viveiro.

Conta  a lenda que a imaxe do Cristo chegou por mar e os veciños a colocaron no altar, pero esta volvía ao mar unha e outra vez, polo que decidiron atala cunha cadea, de aí o popular nome. Que as imaxes relixiosas chegaron por mar é un tema recorrente  en varios puntos da costa galega, algúns cronoloxicamente do mesmo período que o Cristo da Cadea; tamén é recorrente o tema de que as imaxes queiran volver ao lugar onde apareceron, mais non que as aten cunha cadea para que se queden.

A imaxe do crucificado é de madeira policromada e está colocada nun magnífico retablo barroco. A anatomía do Cristo e o pano que o cubre mostran certos paralelismos das miniaturas e marfiles ingleses. Sen embargo non se pode afirmar a ciencia certa que a súa procedencia sexa inglesa. Si que o seu estilo non entra no canon do local e do español da época, mostrando influencias que o colocan nunha estética internacional.