O camiño entra aquí nun pequeno bosque de eucaliptos. Ao longo de todo o traxecto do camiño inglés encontraremos a presenza constante desta especie.
O eucalipto é unha árbore orixinaria de Australia e Tasmania. Está moi estendida a idea de que a Galicia chegou como un presente que o misioneiro Rosendo Salvado enviou, desde Australia e a mediados do século XIX, a súa familia de Tui. Pero este dato non puido ser confirmado documentalmente. Si hai constancia de que, cara a 1870, estaba plantado xa en algúns puntos de Galicia.
O seu aspecto é inconfundible. É unha árbore de tronco dereito e liso, que pode alcanzar grandes alturas, a súa folla é alongada e lanceolada. Medra rapidamente, require sitios onde non falte a auga e é sensible ás baixas temperaturas. A súa madeira é de mala calidade e, na actualidade, é usada principalmente para a obtención de pasta de papel.
En Galicia estendeuse especialmente pola zona costeira e por debaixo dos 500m. A variedade máis frecuente é a Eucalyptus globulus Labill. Actualmente calcúlase que a superficie de eucaliptos representa máis dun 12% de toda a superficie forestal galega.
A plantación desta especie ten os seus detractores e os seus defensores. Para os primeiros está o exceso de auga que extraen do solo e ser unha especie que arde facilmente; para os segundos, o seu rápido crecemento e a súa achega económica. Como planta medicinal se usa, entre outros, como anticatarral e anticonxestións.