Estación de Vilagarcía de Arousa

Para que puidese facerse realidade a estación que estás visitando fixo falta moita paciencia, pois esperouse por ela desde o século XIX e non se construíu até 1956.

Todo comezou cando se creou a primeira liña ferroviaria de Galicia, entre Cornes e O Carril. O tren chegaba ás portas de Vilagarcía, pero non ao termo municipal, pois daquela O Carril era un concello independente.

Polo tanto, Vilagarcía non tiña tren, nin estación, pero si un porto que ía medrando mentres eclipsaba ao do Carril, que non permitía a chegada de grandes barcos. Isto vai cambiar coa construción da liña a Pontevedra e do peirao do Ramal, para chegar cos vagóns directamente ao mar. Iso si, o que non cambia é o de non ter terminal ferroviaria.

En 1913, pasa unha cousa curiosa. E é que Vilagarcía vai conseguir unha estación, pero non porque se construíuse unha nova. Se non porque acababan de fusionarse os concellos do Carril, Vilaxoán e Vilagarcía, e polo tanto a estación máis antiga de Galicia pasa a ser de Vilagarcía. Por certo, que o de “Vilagarcía de Arousa” foi para diferenciar a esta cidade doutra estación de tren chamada “Villagarcía” en Zamora.

En definitiva, a estación de Vilagarcía continúa sendo a do Carril, e para que se atendan ás reivindicacións da cidade vaise formar incluso unha comisión para visitar ao rei Alfonso XIII. Para facilitar o seu acordo, ían cun agasallo baixo o brazo: a illa de Cortegada, para que tivese alí o seu real palacio de descanso.

O plan fracasa, pero o desexo continúa. Será durante a ditadura franquista, en 1956, cando se constrúa a nova estación, máis próxima ao porto e ao centro urbano nun momento de importante desenvolvemento urbano da cidade.