Aduana do Ramal

O lugar no que te encontras ten nome e apelidos: Laureano Salgado Rodríguez, un dos maiores empresarios de Vilagarcía, aínda que nacido en Caldas. A finais do século XIX acumulaba proxectos como o Balneario da Concha, a azucreira de Portas, pioneiro da produción eléctrica, o tranvía de Vigo, consignatario no Carril e Vilagarcía... Entre todas as súas obras, unha das que tivo maior impacto para potenciar de vez o porto de Vilagarcía foi a construción do peirao do Ramal, que se unía ao gran molle de ferro.

Aquí, ao lado da Aduana vese a vía de tren que derivaba desde a liña de Pontevedra, facilitando que os vagóns puidesen achegarse directamente ao mar, onde se podían cargar facilmente con guindastres de vapor desde naves e gabarras. A nova liña férrea comezou a funcionar en 1903, deixando definitivamente na sombra o porto do Carril.

Ao lado deste Ramal ferroviario, controlando as mercadorías, Laureano promoveu a construción das oficinas e almacéns da Aduana de Vilagarcía-Carril, para despois arrendalo á Administración.

O deseño é de Jenaro de la Fuente, arquitecto que desenvolveu gran parte do seu traballo en Vigo. En Vilagarcía deixou un edificio de estilo ecléctico, con ladrillo á vista, pouco habitual na arquitectura da época en Galicia.