CASA ROMÁN TORRES / O PRIORATO DA CABANA

Trátase dunha vivenda da segunda metade do século XIX de estilo ecléctico, cuxa denominación débese ao seu propietario Román Torres, persoeiro destacado do Ferrol da época e dono da imprenta do mesmo nome. Está situada na parroquia da Cabana, nun emprazamento de ladeira con excelentes vistas sobre a ría de Ferrol. Recibe tamén a denominación de Priorado, por localizarse no lugar onde antigamente estaba unha “casa de bernardos” ou priorado dependente de Santa María de Sobrado.

O edificio, que sobresae na contorna polo seu grande tamaño, ten unha forma practicamente cúbica e conta con tres plantas, tellado a catro augas e no alto un orixinal miradoiro octogonal a xeito de faro, totalmente acristalado.

Na fachada principal destaca a presenza dun balcón no primeiro andar, que percorre toda a súa fronte e na parte traseira ábrese unha impresionante galería corrida sobre piares de pedra, que crean un espazo cuberto con soportais na planta baixa.