HOSPITAL DE CARIDADE

Dionisio Sánchez Aguilera foi o promotor, e tamén deseñador, deste edificio comezado a construír no ano 1779 para dar solución á necesidade de coidados asistenciais existentes na cidade neste momento de crecemento demográfico.    

A financiación da obra correu a cargo da Congregación do Santo Hospital de Caridade, institución fundada polo propio Sánchez Aguilera, que foi a encargada de canalizar o amplo número de doazóns obtidas, tanto de particulares como da Coroa, para a construción do recinto.   

O edificio situouse nunha zona entre o perímetro amurallado e o barrio da Madalena, e segue un deseño de planta cadrada cun patio central arredor do cal se vertebran os espazos interiores. O complexo hospitalario compleméntase coa construción dunha capela no flanco sur do edificio. O Hospital de Caridade estaba en funcionamento no ano 1786 e mantivo o seu uso ata o ano 1974 cando foi trasladado á actual localización no barrio de Caranza. 

Hoxe en día o vello hospital e a capela son a sede do Centro Torrente Ballester, un espazo cultural multidisciplinar de xestión municipal e especialmente enfocado ás novas tendencias artísticas.