ANTIGO GOBERNO MILITAR

O edificio foi construído a finais do século XVIII para o seu uso como cárcere. En 1794 atópase ó cargo das obras o enxeñeiro José López Llanos e ano 1802 o edificio xa está en uso. 

Construído nun lugar estratéxico, o final da alameda e conectando os barrios da Madalena e Esteiro, segue unha tipoloxía de edificio claustral moi utilizados nos cárceres públicos. Entorno a este patio organizábanse as diversas estancias do complexo: celas, corpo de garda, xulgados e mesmo dependencias e sas de uso municipais.

Cara o ano 1926 o edificio perde o seu uso xudicial e comeza unha etapa como centro de ensinanza, sendo o primeiro instituto que tivo a cidade e que levou o nome de Concepción Arenal.

En 1944 o entón Instituto é transferido ó exército para o seu uso como Goberno Militar. Para esta nova etapa a edificación sofre unha importante transformación que vai a afectar radicalmente á súa composición orixinal, co engadido de dous pisos sobre os xa existentes, e coa colocación dos elementos decorativos en fiestras e na porta principal de acceso deixando a construción coa tipoloxía e forma actual.

Xa ano 1999 o edificio é adquirido pola Fundación Caixa Galicia, actualmente Afundación, sendo necesaria unha nova transformación, especialmente perceptible nos espazos interiores, para converter o espazo nun centro cultural de grande importancia para a vida da cidade.