VOLFRAMIO PARA OS INGLESES

Desde a area recreativa do Ariño parte a Ruta da Insua [TOPOGUIA], un itinerario circular duns 5 km (2h) que bordea o monte da Insua. As vistas son espectaculares!

Un consello! Non esquezas os prismáticos e camiña a modo se queres ver algunha das moitas especies de paxaros (garzas, garzetas, etc.) que habitan aquí!

O percorrido comeza na praia do Ariño, pasando pola praia do Rego dos Coiros e Punta Sandía, desde onde se pode tomar unha derivación ata o Alto da Insua (104 m). Este é o punto máis alto da ruta e lugar perfecto para levar de recordo unha fermosa panorámica. Desde alí poderás divisar a entrada da ría e a enseada da Basa –un pronunciado entrante en terra en forma de V-, o porto deportivo e pesqueiro, as praias de Lingunde e Area da Vila, a ermida da Virxe do Monte ou a conserveira Cerdeimar, a industria máis antiga da Costa da Morte (1884).

Xa de volta, outra parada interesante é a antiga mina de volframio Amparo, situada no chamado Campo do Turco. O volframio tivo moito importancia no pasado, sobre todo durante a II Guerra Mundial –posguerra española- xa que utilizaba para a fabricación de armamento. A mina Amparo, que abastecía ao exército inglés, estivo en funcionamento desde xullo de 1947 ata agosto de 1959.

Preto da mina atopás á fonte Agramar, de auga doce, pero que nace ao pé do mar; a desembocadura do río Lamastredo e o Pazo de Paxariñas (s. XVI).