TRASLADADO PEDRA A PEDRA

A situación actual do Pazo de Paxariña (s. XVI) non é a orixinal. Foi trasladado pedra a pedra desde San Pedro de Porto ata este seu novo entorno (ao lado do río Lamastredo e fronte á desembocadura do río Grande) tras ser comprado por Evaristo Mouzo, maxistrado do Tribunal Supremo, e dono do Pazo de Mouzo (s. XVIII). En Dor aínda podes ver a capela e o pombal desta pouco común –en canto a arquitectura- casa feudal galega. No lintel da capela hai unha inscrición co nome de Martín Pereira e o ano 1693 que poderían corresponder á data de construción de todo o conxunto arquitectónico.

O edificio é de planta cadrada, con tellado a catro augas –o máis común é que sexa a dúas- e dúas alturas. Nunha das fachadas laterais sitúase a cheminea, o elemento máis sobresaínte do edificio. A fachada principal, que mira ao mar, conta con escaleiras con balaustrada de pedra tallada que suben ao piso superior, onde se pode ver o escudo nobiliario.

O primeiro andar acolle a adega, algúns dormitorios e unha pequena sala de estar. Na parte superior está a cociña cunha gran lareira e outras dependencias. O seu estado de conservación é bo e hoxe o pazo é unha fermosa casa de turismo rural.

VIDEO: Spot Camariñas “Na beira do mar”