O mellor momento para vir comprar peixe ao mercado de abastos de Camariñas son as primeiras horas da mañá, cando os mostradores aínda están cheos dos frescos tesouros cor de prata do noso mar. A oferta dependerá da temporada, pero a lista de especies que arriban ao porto é longa: pescada, abadexo, ollomol, fanecas, congros, robalizas, sardiñas, entre outras, e sobre todo, o famoso polbo de Camariñas e os nosos mariscos.
Se che cadra de estar no porto de Camariñas ou en Camelle, a primeira hora da tarde (15.00 a 17.00 horas), chegan os barcos do día coas capturas; e un pouco máis tarde, arredor das 19.00h, saen os barcos de cerco que volven ao amencer. Sen dúbida, ¡un verdadeiro espectáculo para os sentidos!
Ameixas do Ariño
Entre os mariscos, Camariñas ten unha produción propia de percebes, ourizos e ameixas (xapónica, babosa e fina), berberechos, caramuxos e longueiróns e navallas. Se queres ver como se marisquea non tes máis que achegarte á zona do Ariño, onde traballa a Agrupación de Mariscadoras de Camariñas ou apuntarte nunha das visitas guiadas que organizan. Pregunta na Oficina de Turismo que atoparás no paseo marítimo ou na Confraría de Pescadores.
Teléfonos:
Oficina de Turismo: 981 736 340
Confraría de pescadores de Camariñas: 981 737 219
VIDEO: A pesca en Camariñas “Mar de saberes e sabores”