No Miradoiro do Campo da Costa, ademais de gozar dunha das mellores vistas de Caión, tamén podes ver, cara ao leste, o Santuario da Virxe dos Milagres, situado no lugar de O Outeiro, a 10 minutos a pé e a tan só un par de minutos en coche desde aquí.
Nesta ermida do século XIV e de estilo barroco compostelán, celébrase cada 8 de setembro unha das romarías con maior tradición da Costa da Morte, os Milagres de Caión, declarada de Interese Turístico de Galicia.
As festas comezan o domingo previo, cando a imaxe da virxe, que se garda todo ano na igrexa da Nosa Señora do Socorro, é levada en peregrinaxe ata a súa capela. Ao domingo seguinte, as celebracións culminan coa súa volta en procesión, ata o templo parroquial.
Peregrinos e fonte milagrosa
Aínda que centenares de peregrinos se achegan ao santuario para asistir aos cultos que se celebran pola semana, a maioría dos crentes fano o día propio da festividade.
Durante esta xornada, miles de fieis aproveitan para visitar a fonte milagrosa, situada ao carón da ermida e á que atribúen poderes para curar enfermidades.
A Virxe dos Milagres garda unha estreita relación cos mariñeiros da vila pois, o primeiro que ven cando volven do mar, é o templo da virxe que os recibe desde o alto.
Obten máis información na audioguía