Un dos lugares máis concorridos durante o verán na Costa da Morte é o paseo marítimo de Caión.
Esta senda empedrada, que une a vila coa praia das Salseiras, converteuse no lugar de preferencia durante os meses de sol.
Se xa percorreches un tramo, entenderás que o camiño permite gozar de longos paseos ao carón do mar e de infinitos momentos para perderte no horizonte.
Se miras ao fronte, contemplarás a enseada que está formada polas praias da Arnela, Cárcere Vello, Caracoleiro e As Salseiras (a principal). Nesta última, acostuma a ondear a bandeira azul, que certifica a calidade das súas augas e a excelencia do seus servizos. Podes baixar ao areal a través de accesos de pedra e madeira, que están adaptados para persoas con mobilidade reducida.
Ás túas costas, atópase o Museo do Arquivo da Pesca, situado no emblemático edificio da Confraría de Pescadores.
Nesta mesma liña, tamén ves o perfil da igrexa parroquial da Nosa Señora do Socorro, que foi construída polos monxes de San Agostiño no século XVI e cuxo convento se sitúa xusto detrás de ti.
Continúa o percorrido polo paseo e goza en plenitude de todas as belezas que che ofrece.
Coñece máis sobre o paseo e as praias neste vídeo
Coñece máis sobre a vila de Caión neste vídeo
Coñece a Rede Turística de Caión