ESPAZO MILENARIO

Aquí, xunto aos "Baixos de Baldaio" encontras unha baixada á praia. Pero, coñeces o que existe ao seu arredor?

Tes unha barreira de dunas de 3 quilómetros, que é a que une Razo con Baldaio, unhas formacións xeolóxicas milenarias. Froito tamén desta acción do vento, o sal, os diferentes hábitats, e por suposto os anos, formouse unha marisma con estreitas zonas de vexetación que forman canles polas que entra a auga cando sobe a marea.

Este enclave foi protagonista involuntario dunha ardua loita por recuperar un espazo cunha paisaxe destruída, que lexitimamente pertencía aos veciños da zona e que lles permitía subsistir grazas ao marisqueo. Manifestacións cidadás e duras represións deron froito á devolución da lagoa ao pobo na década de 1990.

Na lagoa, as mariscadoras continúan faenando hoxe en día. Mira o vídeo que che explica como é o labor de marisqueo e escoita o audio que che conta como se formou este espazo.