"Senda do Mar" é un proxecto promovido polo Concello de Carballo e financiado con fondos europeos a través do GAC3. Consiste nunha ruta autoguiada por códigos QR que che levarán dende aquí, o porto de Razo, ata a zona de Punta do Sal, percorrendo así o espazo natural Razo- Baldaio.
Nesta senda encontrarás información sobre a paisaxe, a biodiversidade, a gastronomía, o ocio e as tradicións deste espazo e do municipio de Carballo, poñendo en valor o litoral carballés como recurso natural e como un espazo imprescindible para entender a idiosincrasia da zona.
O areal Razo- Baldaio é un dos máis concorridos no verán polos visitantes que se achegan á Costa da Morte. Tras anos sendo distinguida coa bandeira azul, a zona de praia de Carballo consolidouse como un paraíso dos deportes náuticos, no que o surf é o rei. Pero ademais das actividades turísticas, a riqueza ambiental e a importancia da súa biodiversidade fan desta franxa costeira un dos puntos máis interesantes para interpretar o ámbito mariño. Exemplos son as formacións dunares, a marisma de Baldaio, os acantilados de Razo...
O porto no que agora te encontras, foi coñecido antano por ser base de embarcacións dedicadas á pesca. Hoxe transformouse nun moderno porto deportivo no que atopar experimentados mariñeiros e amantes da pesca deportiva.
Escoita a historia deste pequeno recuncho da costa de Razo.