Foso

Para poder entrar no castelo de Moeche, tería que estar a ponte levadiza baixada. Se non, sería difícil salvar o foso que rodea a fortaleza, que nalgún lugar chega aos 10 metros de profundidade. Isto sábese polas investigacións arqueolóxicas que permitiron deixar á vista mesmo as marcas que os picos fixeron cando se escavou na propia rocha. 

E é que o castelo de Moeche érguese sobre un outeiro pedroso, en pleno val de san Xurxo. Unha fortaleza con forma poligonal cunha soa torre, a de homenaxe. Nela pódense identificar os escudos das familias que mandaron construír o castelo actual, na década dos 70 do século XV. 

Sobre a pequena fiestra que se abre na torre, á esquerda verás os dous lobos de Osorio e á dereita, un castelo, un león e seis pequenos círculos, o emblema da familia Enríquez de Castro. Estes dous escudos son o símbolo dunha unión, o casamento entre Beatriz Enríquez de Castro e Pedro Álvarez de Osorio, nomeado primeiro conde de Lemos. Máis abaixo á esquerda, loce con fachenda o escudo do Duque de Arjona, poderoso título da liñaxe de Beatriz. 

Antes de cruzar a porta, podes rodear o castelo por riba do seu foso e baixo a súa impoñente muralla. Descubrirás na parte traseira unha estrutura saínte, vital para calquera vivenda: a latrina.