Os Socalcos da Insua, valados de pedra que serven para conter as terras de cultivo nos terreos moi pendentes, forman parte do patrimonio natural de Fisterra.
Ves o cabo da Nave? Pois detrás del na punta do Castelo, está o máis máxico castro costeiro, Castromiñán. Parece incrible que houbera un asentamento neste cantil!
Os castros son construcións da Idade de Ferro e os da nosa costa son posteriores ao s. VI a.C. Castromiñán, agóchase na natureza nun outeiro entre cantís que semellan un lugar inhóspito. Mais o emprazamento non é casual, pois os seus habitantes sabían que non necesitaban máis defensa nun lugar rodeado de precipicios e no que non podían ser vistos. Para quedar sen palabras tamén son os mananciais que hai nesta fortaleza. Un deles nace ao pé da muralla e descende ata o mar, formando un abraiante foxo natural.
Seguindo a liña de costa cara ao norte está punta Arnela, e a praia do mesmo nome, punta das Pardas e a praia do Rostro. Esta é a ruta que seguen os peregrinos que fan o Camiño Fisterra-Muxía ou viceversa antes de entrar en territorio do Concello de Muxía.