Estás na zona coñecida como a Insua. Aquí atoparás unha antiga calzada, probablemente de orixe romana, á que se coñece como “A porta de Marcos”.
Aparte de continuar a túa ruta cara á praia de Mar de Fóra, se vas por esta calzada en dirección sur (ao Cabo) subirás pola cara occidental do Monte Facho. O camiño é unha antiga senda que circunda o promontorio co Océano Atlántico de fondo. Se prefires esta opción, na ida ou volta da túa visita, verás puntos xeográficos de referencia: a Punta dos Oídos, a Illa do Centolo e o grandioso Cabo da Nave, detrás do que afundiu o buque Casón en 1987.
Ademais do sendeirismo, en Fisterra tamén se goza do mar cos deportes náuticos, que cada vez teñen máis afeccionados. Vela, buceo, windsurf ou surf no Rostro e Mar de Fóra.
E despois dunha xornada no mar? Fisterra conta cunha ampla oferta hostaleira para degustar os seus produtos. Ourizos, ameixas, percebes, variedade de peixes e, como non, a estrela da vila: o longueirón.
De volta da vila, aproveita para probar peixe e marisco fresco do mar de Fisterra! E se nos queres dar envexa, cóntanos a túa experiencia no noso Facebook: www.facebook.com/fisterradendeanube.