O PORTO DO FIN DO MUNDO

“Fisterra dende a nube” é un proxecto promovido polo Concello de Fisterra e financiado con fondos europeos a través do GAC4. Consiste en dúas rutas autoguiadas por códigos QR. Unha levarate ata o singular faro, e outra guiarate ata a praia de Mar de Fóra.

Nelas atoparás información sobre as xentes, as profesións, os costumes, a gastronomía, o lecer e as tradicións fisterrás, poñendo así en valor o patrimonio e a relación co mar do Cabo de Fisterra, Patrimonio Europeo dende 2007.

Fisterra está considerada o final da zona da Costa da Morte. O seu nome, procedente do latín finis terrae (fin da terra), parece responder á antiga crenza romana de que aquí acababa a terra e comezaba o mar. Tamén é punto final para miles de peregrinos que alongan o Camiño de Santiago ata aquí para atoparse co mar.

O seu porto é o principal lugar de actividade da vila. Nel podes sentir a Fisterra máis cotiá, pois case a totalidade dos seus poucos máis de 5.000 veciños se dedican a actividades que teñen que ver coa pesca. Todo en Fisterra xira en torno ao mar… incluso a vila medrou en forma de anfiteatro sobre o porto.

Pasea polo peirao e observa a actividade dos mariñeiros, entra na primeira lonxa turística de Galicia e escoita a cantiga do lonxeiro na poxa, ule a brisa salgada e saborea Fisterra nos locais de hostalaría, que contan co mellor e máis fresco peixe e marisco do que podas gozar.