A illa de Ons presenta dúas caras ou vertentes ben diferenciadas, occidental e oriental u oeste e leste, a primeira máis abrupta, con cantís moi verticais, e a segunda máis suave e amable, con areais e sistemas de dunas.
É unha paisaxe de contrastes modelada pola acción dos axentes erosivos. Son illas alongadas e moi caracterizadas por esa morfoloxía oposta entre as caras oeste e leste.
A ondaxe do mar ao longo do tempo foi erosionando a costa, xerando fendas, socavando e provovando a caída de bloques, formándose deste xeito os cantís verticais que observamos na actualidade así como as furnas ou covas mariñas. O vento e a salinidade tamén contribuíron a modelar a paisaxe de ambas caras.
Desde este punto da enseada de Caniveliñas podemos observar os ecosistemas de cantís litorais, as bocas das furnas ou covas mariñas e as colonias de cría de aves mariñas sedentarias como a gaivota patiamarela e o corvo mariño cristado.