Atopámonos na excelente atalaia e miradoiro cara o interior e sur da ría de Pontevedra así como da costa oriental de Ons, coa praia de Melide ao Norte e ao Sur o peirao, o barrio do Curro, a praia de Canexol, a illa de Onza e mesmo as Cíes ao fondo. Tamén a praia da Lanzada, Bueu, a Costa da Vela...xa no continente. Chegaremos a través dun agradable e curto paseo no que poderemos observar os ecosistemas de matogueira e os bosquetes de ribera, un lugar apropiado para a observación de aves terrestres, mamíferos, réptiles ou mesmo anfibios, por existir pequenas zonas húmidas asociadas ao rego do Castelo que cruzaremos en distintas ocasións.
O entorno de cantil e matogueira da punta do Castelo está colonizado pola gaivota patiamarela. Tamén se poden observar os corvos mariños cristados pousados, nadando ou mergullando.
Existen aquí pequenas furnas ou covas mariñas propias da cara leste das illas que son frecuentadas pola lontra.