Arquipélago de Sálvora

O arquipélago de Sálvora (Ribeira) con 2557 hectáreas, 248 terrestres e 2309 marítimas, está situado na entrada da ría de Arousa e conformado por unha illa principal, Sálvora e un conxunto de illotes como Noro, Vionta ou Sagres.

A illa de Sálvora é visitable en embarcacións de pasaxe (e recreativas) desde o porto de O Grove ou desde Aguiño-Ribeira.

O uso público está restrinxido á ruta do Faro e á ruta da Aldea (esta só se vamos acompañados dun guía autorizado). Son rutas de ida e volta. A ruta do Faro conta con paneis informativos-interpretativos.

De suaves pendentes e cunha altitude máxima de 73 m (Gralleiros), presenta unha paisaxe de rochas graníticas redondeadas, erosionadas pola acción do vento que adquiren as máis caprichosas formas, son os denominados bolos ou monstros de Sálvora.

Destacar as colonias de aves mariñas, de gaivota patiamarela , escura, gaivotón ou corvo mariño cristado. Ao navegar cara as illas podemos sorprendernos coa presenza de mamíferos mariños como arroaces e golfiños, aves de paso ou migratorias como mascatos, pardelas ou carráns.

Elementos e lugares destacados son o Faro, os sistemas de dunas dos areais do Almacén e dos Bois, a vella factoría de salgado de peixe, e a taberna (reconvertidas posteriormente en pazo e capela), a fonte de Santa Catalina, a eira de mallar, a telleira, a Aldea con hórreos e cortes ou o monumento da Serea.